تمنية وعشرين : من الألف إلى الياء.

أنا، سراب إنسان موزع في شوية روح..
بخاف أكتب، كتر قولي، بخاف أسكت ضميري يروح..
تراهو العيب من الواطة، الأرض السقايتا نوح..
ثواني الفرحة في بلدي، ما محسوبة تاريهو الزمن مجروح..

جمعتا الفضل مني..
حلمتا على الورق أحلام، أيا صوت الحروف غني..
خليت الكلام عنك شان ما الوجعة تدفني..
دوام يا عازة ظالمنا و يا ريت لو يخيب ظني..

ذكراك شايلة تعب الرفقة والأصحاب..
رميتيهم بعيد عنك، نسيتي الكانو لينا قراب..
زرعتي على المسافة الشوك، قفلتي وراهم الأبواب..
سقيتينا العذاب والويل بقيت أحزن بدون أسباب..

شلناك هم..
صبرناك رغم كل ألم..
ضارينا القليب المات، ترابك لسه مليان دم..
طرينا نغني ليك تاني، لقينا سكاتنا كان أرحم..

ظروف الدنيا جابرة الكل..
على جمرك مشينا كتير نكوس الضل..
غريبة تكون ما بين أهلك تعيش في قبر..
فيا بلد المآسي كفاك ما دام فيك نفسا حر..

قسيتي على جميع من فيك..
كتمتي البسمة ما بين الدموع والضيق..
لا ضحكة بتسر البال، لا فرحا تشاركو صديق..
مشينا علي دورب زيفك، وبئس طريق..

نسيت الضي..
همومك جد صعيبة علي..
وصلتا الحد، كرهتا البي..
يا رب العباد ألطف، يا رب تنفرج يا خي..